pantun gurindam anak minang

Tarambau elok tarambau,,
Santano tagak ditapi lurah,,
Mari Gurau kito bagurau,,
Dalam bapantun baaleh garah,,
Kayu kasau di balah ampek,,
Elok di ukue sarato jangko,,
Bagurau dima batampek,,
Di Pantun Gurindam Ranah Pusako,,
***
Barabah tabang kasawah,,
Jatuah kadalam bulak ketek,,
Bagarah buliah bagarah,,
Tatap didalam kato nan ampek,,
Elok di buang kato siarak,,
Bia nak kuek raso saudaro,,
Kito babaua tangah rang banyak,,
Bapaga rapek pusako bundo,,
Sampai sampaikan kato elok,,
Manih di muluik lamak di danga,,
Kato kan buruak rancak di kirok,,
Jago itikat sarato norma.,,
Sakiro Banang malawua kusuik,,
Rancak diputuih di ulang sambuang,,
Tengganglah juo alua jo patuik,,
Di agak urang nan katasingguang,,
Banda ketek panuah jo samak,,
Baladang urang ditapi rimbo,,
Bakato elok diagak agak,,
Mamak,dunsanak banyak disiko,,
****
Dima bana bumi dipijak,,
Disinan langik kito junjuangi,,
Bia ndak timbua kato siarak,,
Ado aturan nan dituruti,,
Sakiro bajalan alua jo patuik,,
Indak kalua dari aturan,,
Lamak didanga elok di sabuik,,
Bakabek rancak dalam gurauan.........